فصل 3/3 .. وسبب تدهور الطلاب ..!!!

بسم الله الرحمن الرحيم ..

هلا والله بأعضاء المنتدى العزيزين..

قصه كتبتها وأتمنى أنها تنال إعجابكم.

.(( فصل 3/3 )).

المدير(معجل) في الطابور الصباحي / أحم أحم .. الصوت واضح .. (( فالح, [التتني ](لقب الشهره) )) وفيه حالت خمول .. يلتفت على أخوياه ويقول : تشوفون شي يا شباب . قالوا لا .. قال : ولا أنا .. المدير : أسكت أنت وياه ونتبه معي .. : حنا الحين في بداية السنة وأبي من كل طالب أنه يتقيد بالأنظمة وهناك جائزة على الفصل منظم ومرتب. ((التتني)) يقول للي قدامه((سعد بو سنه)) : تتوقع بعد خمس سنين من الجهد وهم مايعطونا جائزة تهقا يعطونا ذي السنة ..؟؟ قال ((سعد بو سنه)) وهو يناظر المدير بحقد : لو ماعطونا بفجر بالمدرسه .. ( الأخلاق زفت ) . وهم في غبنه ألا ذاك الي جاي من وراهم ويخبط فيهم ((الوكيل (مرسي) )) أنتبه يآآآآله ((الجنسيه : مصري )) ..

* *

رقو الطلاب .. وكل واحد يقول لثاني عن الأفكار الي بيسوونها في فصولهم ألا فصل (3/3) .. لأن أغلب الي فيه ساقطين 3 , 4 سنين وأيضاً المدرسه حاطه المدرسين الأجانب عندهم .. بختصار وماوراهم خير.. لدرجه أن المدير حاط فصلهم جنب غرفته لأنهم مب لم الدراسه أساساً(( على أعبتار أنهم ساقطين كم سنه)) .. المهم مرت الأيام والمدير ماعجبة وضع فصل(3/3) .. دخل عليهم يوم من الأيام .. وأول مافتح الباب شاف الطلاب وكنهم جايين من حرب .. الي منسدح ومرفع سيقانه على الطاوله .. والي صافله ثلاث كراسي ونايم عليها .. و و و ألخ .

.. طبعاً كان في نفسه أن الفصل ذا خلاص انتهى .. ومافيه أمل. وكان وده يطلع ويسكر الباب .. بس ضميره ماطاوعه.. قال : وضعكم ياشباب مايصلح .. الفصول كلها تتسابق على أنها تكون الأفضل ونتم متيسين .. مايصلح كذا .. يالله مين الي يوعدني يجيب لزقات للفصل وعطر و و وألخ . رفع يده أحد الطلاب .. المدير أستبشر خير .. قاله المدير: تفضل وش عندك . .؟؟ قال الطالب .. وشكله دايخ ووده ينام بس ينتضر الفرصة : أستاذ متى العطلة .. ؟ . بعدها قام أحد الطلاب وهو يناظر المدير بحقد .. وكأنه يقول أنت وش تبي ؟؟؟ .. حط علبة عصير في الزباله وهو يناظر المدير .. بعدها قال : قصدك نسوي كذا .؟؟ بعدين رجع لمكانه وبكل هدوء عرف المدير أن الفصل أساساً ماكان معه يوم يتكلم .. طلع وهو يدعي أن ربه يلهمه الصبر .. ومايتعجل في طردهم ..

وصل المدير لم غرفته .. أول مادخل سمع صوت التلفون يرن .. رد قال : ألو .. قال المتصل : السلام عليكم .. رد السلام وبعدها سأله عن أحوالك وكيف المدرسة و و و ألخ . قال المدير مين معي .. ؟ قال حنى من وزارة التربية والتعليم .. وأن شاءلله بكره راح يجيكم موجهه يشوف الطلاب والمدرسة ككل . . .. ألخ . أنتهت المكالمة وكان المدير مستانس لأن الفصول متجهزه ومزينين فصولهم . لاكن وقف تفكيره يوم تذكر فصل( 3/3 ). وطارت عيونه وكأن منكب عليه موية حارة .. نادا بصوت عالي ( مررررسي) .. جا الوكيل مسرررع .. وقال : هلا ياسعت الباشه .. في أيه حصل أيه .؟؟ . قاله الوكيل السالفه ...وأن بيجيهم موجهه .. بكره وقاله عن فصل (3/3 .) الوكيل كأن أحد مخبره أن راتبه راح ينقص خمس الريال .. وفي أثناء الكلام الي يدور بينهم دخل مدرس الرياضيات ( بشير ) .. وكان توه جاي من فصل 3/ 3 .. دخل وكان معصب ويسولف مع نفسه .. وكان لابس عمامه عليها علك(أبو لصقه) ..ولونه واضح .. لأن العلك لونه وردي والعمامه بيضا .. وكان باين .. غير لصقت موية( هنا )الي ورا .. وكأنه طاب في زباله . قال للمدير : وش فيه سلامات .. !!.؟
قال بشير : يا أستاد الفصل دا أنا ماتحمله الحقيقه .. يكفي أسائات يكفي تهريج من قبل الطلاب .. أنا ذات نفسي ما أتصور أني مدرس أزا دخلت الفصل .. لما أجي أشرح أسمع تزمير من الخشم .. وناس بيكتبون أبيات شعريه وكنهم على شاطي النيل .. هدا غير الطلاب الي يبصبصون على النافذه .. ومش حاسين بأدمي قدامهم .. داير عليك الله يازول تعفيني من تدريسهم . المدير ناظر الوكيل وقال : وش الحل طيب .؟؟ رد عليه بشير بكل هدوء : نرفدهم .. قاله المدير هذا مب منطق .. بكره بيجينا موجهه .. قال المدير : لازم مانعلمهم أن بيجينا موجهه لان لو درو راح يسببون بلبله زياده وهستره وخفت دم .. قال الوكيل : ومقطعش كلامك ياستاد عجله .. أنا في بالي مرسوم (( يعني خطه)) .. وراح تشوف .

* *

بدا الطابور .. الموجهه يسلم على المدرسين .. وكان الأستاذ بشير تدور فوقه ذبانه ..تحديداً موقع العلك تبع أمس . عم الهدووء على المدرسه .. شوي ..ألا أصوات كفرات ورا سور المدرسة مباشره .. وهستره .. وأصوات كانت واضحة جداً .. وباين أن الي مطلعها (سعد بوسنه والتتني) .. ( أستاذ معجل لعيونك ذي الخشه ) و ( أروح مويه مع كرفتتك ألي كنها زمزميه .. يا أستاذ مرسي) ( الكريم الي فوق راسك ياستاذ بشير وش الماركه تبعه..؟؟ ) .. أستاذ مرسي كان مدخل يدينه في جيوبه .. وكانو الطلاب كلهم.. يناظرون الأستاذ مرسي .. وودهم يشوفون الكرفته... ويضحكون عليه ..وهو وده يقطع (بو سنه وتتني وتكملة الربع الي جايين معهم) بسنونه .. شوي .. ألا الثنين داخلين مع باب المدرسة وكنهم محششين .. كل واحد يحلف على الثاني ــ والله أن تدخل أنت يا تتني ، لاوالله أنت أقدم في ذي المدرسة أنت الي تفضل يابوسنه .ــ وكأن الطلاب يناظرون مسرحيه .. والمدرسين يقولون وش جابهم ذولا .. لدرجه أن الذبانه الي كانت تدور فوق الأستاذ بشير وقفت وقاعده تطالعهم .. كل واحد يحلف على الثاني .. وعايشين جو ثاني .

المدير وهو يبتسم قدام الموجهه .. رجف الوكيل من كوعه مع ورى .. وقاله : وين خطتك ياحضي .. على فكره لو أشوفك قايل يوم من الأيام عندي مرسوم راح أمسح بك البلاط .. دخلو (التتني وسعد بوسنه وربعهم ) المدرسه .. وكانت بيديهم هدايا و جايبين عود ومسويله كرفته .. والي جايب بسكوت أبو ولد .. و و و ألخ . جا التتني وأخذ الميكروفون .. وقال يالله ياشباب باركو لمديرنا وحبيب قليبنا الأستاذ معجل .. لتخطيه حاجز الخمسين .. المدير في ذي اللحظة ألتفت على الوكيل وعلى وجهه أنواع علامات الأستفهام .. وقاله وش السالفه .. وش أنت قايلهم ..؟؟ قال وهو يحاول يصرف بس ما أمداه وأساساً مايمديه يرقعها .. قال وهو يرجف : دنا ألت لهم أمبارح أن الأستاذ عجله واخذ بال حضرتك أن اليوم هو عيد ميلاده . والأستاذ عجله قاطع كلامه تصفيق الطلاب وكلن يقول (مبروووك )... شوي وسكت الوكيل .. ناظره المدير لاشعورياً قاله : أنت مطرود . ومشى لم التتني .. وقاله .. وهو يبتسم : خلاص ياشاطر كفايه مزح .. ماودك تروح لطابورك.. التتني يناظر سعد بوسنه وكأن حاط في وجهه ذي العلالمه( ) .. بعدين ناظر المدير وقاله : الشرهه مهيب عليك الشرهه على الي يجيبلك بساكيت وعود وحلاو.. أنت ووجهك الي ناقصه لمبه بس تعلق على خشمك وتسير بيت نحل .. ذب عليه المكرفون .. وقال لخوياه مشينا بس ياشباب .. خلو مديركم هو وسفراء الدول العربية الي معه .((يقصد المدرسين )) .. الموجهه يوم شاف هذا المنظر .. وشاف ردة فعل المدير عصب .. وراح على طول لم التتني والي معه .. وقالهم أنه موجهه وأقدر أفيدكم .. وأنه معجب بروح الفكاهه الي فيكم .. ونكم قادرين على النجاح والتفوق .. ألتفت عليه التتني .. قال .. : تكلمنا ..؟ قاله : أيه . قال : لا تعب عمرك .. خمس سنين من الفشل .. ما أعتقد أنك راح تسوي شي .. أقنع الموجهه الطلاب .. ورجعو معه .

الطلاب أشتكو من المدرسين الي يدرسونهم وكثرة الأجانب .. خصوصاً أن الوكيل أجنبي ومايشعر بالضروف الي نعيشها أذا تأخرنا أو إذا أخذت السياره وقمت تدورأو ركبت معك أخوياك .. بكونه ماجرب البيئة الي يعيشها الشباب السعودي .. وهو إذا شاف هذا الشي فينا ياخذ علينا فكرة سلبيه لأن في ديرتهم مافيه مثل هذي الأشياء .. لدرجه أنه يضغط على المدرسين بحيث مايعطون الطالب ولا درجه .. ((بالغه العامه مايدف الطلاب)) . .. هذي مب بس في المدارس حتى في الجامعات .. وقس لى ذالك .

بعد ما نظر الموجهه لشكوات الي قالوها الطلاب حاول قدر الأمكان تنفيذ بعض منها .. ولله الحمد الطلاب التتني وسعد بوسنه . وعيال فصل 3/3 .. تخرجو .. وأصبحو موظفين ومحد منهم محتاج حاجه ..

أنتهت القصه ... والي يقول أنها قصيره .. والسبب واضح .. لأن مافيه ذي الأيام ناس تقرا والمواضيع الي موجوده حالياً أكبر دليل..

وكتبتها على عجلة من أمري .. أتمنا أني أشوف أرائكم ...

ملحوظه //
هذه القصه ايام ماكنى انا وبندوري في المدرصه

أول قصه في المنتدى تكتب بدون ذي الأيقونات (( )) , (( )) .

والسلام عليكم ورحمه الله وبركاته

اخوكم /راكان..

وقسم اني تسدحت من الضحكـ اخوي يقولي وشفك ميتهـ قرا المكتوب وانسدح بدالي

هههههههههههههههههههههههههه

الله يفضحكم اربع سنين صاقطين صدق فضيحه الله يعين اهلكم

زين تخرجتو وفكيتو المدير منكم

كثر من هالمواضيع وربي مت من الضحك

لا تحرمنا هسترتك ورجتك خخخخخ

ننتظر الباقي